Mat 6 | ATA | STEP | Mo Iesu musolonu vaivaikala noxou la muvikala aloxo 'o. “Ngasaxilainge laixe mamu sou ngingi nga'oxonu 'ili'ilixo mulapu no ie'i ta mitemasi sou imaisinge. Xo lexe ngingi nga'oxonu aloxo ne la umomomo sou Maminge teitexi no opo loxotolo ulosinge ulusou vile uasi.

a 6:1Mat 23:5

b 6:5Mat 23:5; Luk 18:10-14

c 6:71Ta 18:26-29

d 6:8Mat 6:32

e 6:10Luk 22:42

f 6:12Mat 6:14-15, 18:21-35

g 6:13Luk 22:40; Iak 1:13; Ioa 17:15; 2Te 3:3; 2Ti 4:18

h 6:14Mak 11:25-26

i 6:16Ais 58:5-9

j 6:19Iak 5:1-3

k 6:20Mat 19:21; Luk 18:22

l 6:25Pil 4:6; 1Ti 6:6-8; 1Pi 5:7

m 6:26Mat 10:29-31; Luk 12:6-7

n 6:291Ta 10:4-7; 2A'a 9:3-6

o 6:32Mat 6:8

p 6:331Ta 3:11-14; Lex 37:4, 25; Rom 14:17

Matthew 6

'Ili'ilixo sou Isu'uline'i ta Mitema Va'axu

1 ^aMo Iesu musolonu vaivaikala noxou la muvikala aloxo 'o. “Ngasaxilainge laixe mamu sou ngingi nga'oxonu 'ili'ilixo mulapu no ie'i ta mitemasi sou imaisinge. Xo lexe ngingi nga'oxonu aloxo ne la umomomo sou Maminge teitexi no opo loxotolo ulosinge ulusou vile uasi. 2 La sou ngingi ngamasaxa lexe ngasu'uline'i ta mitema ane pausi'a no anu mimii mose'i, la mamu sou ngapalusou itema vile u'uli mo utautaunu xoolau sou uvikala lamana aloxo ta mitema sou kalakalavoi i'oxo'oxonu no taasou lalotu noxi'a, xe no vote'i sou ta mitema imaisi'asi. Eni avikalangengi manina aloxo ta mitema ane i'oxonu 'ilixo aloxo ne ane'i mino'u ulusou mukalu. 3 Lexe ngingi ngalosi'a ta mitema ane pausi'a no anu mimii no avonge tema. La mamu sou avonge ae ulavusou mii ma'ia ane avonge tema u'oxo'oxonu. 4 Mo sou su'uli noxinge ne utalumesi. Ngingi nga'oxonu aloxo ne la Maminge umaisou mii ma'ia ane nini ne'oxonu mutalume ne la Anu ulosinge ulusou.

Iesu Mulosie'i ta Molomolo Noxou sou Ikilaka

(Luk 11:2-4)

5 ^bVoxo ane lexe ngingi ngakilaka la mamu sou ngingi na'oxonu loxo ta mitema sou ikalavoi i'oxo'oxonu. Ane'i imasaxau sou itulu la ikilaka no nano no taasou lalotu noxi'a ta Iutaia mo no vote'i mupita sou ta mitema imaisi'a. Eni avikalangengi manina. Lexe ane'i mino'u ului'a mukalu. 6 Ia voxo e lexe nini namasaxa sou nakilaka la nini na'unalai no kaveutu noxine mo natatu ukalu la sou nakilaka ulai noxou Mamine muxolu mutalume. La sou Mamine umaisou mimii e ngingi nge'oxonu mutalume ne, la sou Anu ulosinge ulumengi. 7 ^cLa sou lexe ngingi ngakilaka la mamu sou nga'oxonu vaikala piena vitavitanisi loxo ta mitema ane ane'i ta Iutaia uasi i'oxo'oxonu. Ane'i ixavutala lexe ivivikala tavu'alo la Lataua ulomusi'a. 8 ^dIa mamu sou ngingi ngamulinu 'ili'ilixo noxi'a, xo tei no mine ngingi ngakilaka uao la Maminge mulavu sou mii ma'ia ane ngingi ngemasaxau. 9 Ngingi ngakilaka aloxo 'o,

“Mamixe nini nexoo teitexi no opo loxotolo, laixe nexi tatoxonu ualasine.
10 ^eLaixe nini nalu'e nasaxila'u tuala ane no lia 'o.
Mo laixe talomuxene no lia 'o loxo ane'i ilolomuxene teitexi no opo loxotolo.
11 Vaimomo 'o nalosixe la'ilali sou nexi ta'ou voxovoxo.
12 ^fNaxiunu tumalineu 'ili'ilixo masumasua noxixe
aloxo nexi taxiunu tumalixeu 'ili'ilixo masumasua
noxi'a ane'i ane mi'oxo masua mune'e noxixe.
13 ^gMamu sou naolenexi ulai no anu mimii sou tovotovo.
Ia naolenexi ulai va'axu no anu 'ili'ilixo ane masumasua. (Xo saxisaxila'u ne noxinesi mo xavi mo lamana anu kaluxu uasi. Manina.)
14 ^hMo lexe ngingi ngaxiunu tumalingeu 'ili'ilixo masumasua ane ta mitema mi'oxonu une'e noxinge la Maminge uxolu teitexi no opo loxotolo kalumo uxiunu tumalou 'ili'ilixo masumasua noxinge. 15 Ia lexe ngingi ngaxiunu tumalingeu 'ili'ilixo masumasua ane ta mitema mi'oxonu mune'e noxinge uasi la Maminge kalumo umomomo sou uxiunu tumalou 'ili'ilixo masumasua noxinge uasi.

Peletoto sou Pelemu

16 ⁱLa sou no mine ngingi ngapelemu la ngakasangi loxo ta mitema sou kalakalavoi i'oxo'oxonu mamu. Ane'i i'oxonu ie'i uolevolo sou lexe ta mitema imaisi'a lexe ane'i mipelemu. La sou eni avikalangengi aloxo 'o, ane'i mino'u ulusou mukalu. 17 Ia no mine ngingi ngamasaxa lexe ngapelemu la nga'ulo mo ngamulaxu mii tuma'u lailaixe no vasimenge mo iengi. 18 Mo sou ta mitema ilavusou lexe ngingi ngapelemu uasi. La Maminge anusisi e talavusou tamaisou uasi, Anu molusi umaisou mii ma'ia ane ngingi nge'oxonu mutalume ne la sou Anu ulosinge ulusou.

'Ili'ilixo sou Ixalisou Mimii Lailaixe

(Luk 12:33-34)

19 ^jMo mamu ngingi xavutalamengi utulu no anu lamoli mo lavuluti e ngamulaxu no lia 'o. Xo lamoli mo lavuluti ne ngamulaxu la tatotoxae ixotosou mo uai la ukukakuka la usu'a, xe ta mitema sou pakali i'una no tani la ipakalinu. 20 ^kIa anu laixe lexe ngingi xavingengiu lamoli mo lavuluti sou teitexi mo ngamulaxu. Xo lamoli mo lavuluti ane teitexi ne tatotoxae ixotosou mo uai la ukukakuka xe ta mitema sou pakali imomomo sou i'unalai la ipakalinu uasi. 21 Xo no tuala ane ne mimii lailaixe noxinge a uai no anu ne ia tanenge mo xavutala menge a uxolu lai ne kalumo. 22 Ngingi iengi ne, anu teelu sou vasimenge. Xo lexe iengi ne laixe, la anu ulosinge lamana. 23 Ia lexe iengi ne masua, la anu ulosinge isivoxosi, ia lexe teelu ne uxolu no nano noxinge ne uasi la isivoxo ne uxali tila misevile. 24 Itema sou xaixai vile umomomo sou uxaxai noxi'a ta tatila noxou tamei uasi. Xo maasi xe xavutala noxou ukalipala, la anu umasaxau vile uasi, ia tanu vulusiu ane vile aloxo ne la sou ngingi ngamomomo sou ngaxaxai no iou Lataua xe ngaxaxai sou lamoli kalumo uasi.”

Tangengi Uangenge Mamu

(Luk 12:22-31)

25 ^lMo Iesu muavuti la muvikalane'i ta mitema la aloxo 'o, “Mamu sou ngaxavutala piena no anu maulingenge mo ngavikala lexe nenge ta'ou mii ma'ia mo taiexu mii ma'ia xe tasakiinu mii ma'ia sou vasimenge? Xo la'ilali anu utila no anu maulingenge mo tokolomo kalumo utila no anu maulingenge? Uasi. 26 ^mLoxo naxavutalane'i ta ngiala, ane'i ilavusou itotounu xai mo imolo la'ilali uasi mo, ane'i si'a tani sou ipitanu la'ilalixa'a no anu uasi. Ia Maminge anu muxolu no opo loxotolo molu ulosi'a la'ilali. Io ngingi ne loxo ta ngiala uasi ngingi ne tatila musuku noxi'a mo ngeuaulixa'a. 27 Ia lexe vile nonixi noxinge ne uxavutala piena no anu maulixu lexe uxolu maxuveeni sevile, la anu umomomo sou molu usukunu maulixu ulai sevile? Uasisi manina. 28 Loxovaa la ngingi ngaxavutala piena no anu mimii ane loxo tokolomo 'o? Ngaxavutalanu kungalo seseenu ne a loxovaa? Anu uxaxaisou u'oxonu tokolomo uasi. 29 ⁿIa avikalangengi lexe Solomoni tatananu tuala ne muno'u mimii lailaixe no lia 'o mukalusi, ia kungalo seseenu muuaulixu tokolomoxu ne. 30 Ia lexe Lataua utokolomonu iaiae no anu seseenu ane uleme vaimomo 'o xe ne'iela la ta mitema ixotosou sou i'elaxu, la anu utokolomongengi laixe manina musuku uuaulixu sesee ne. Ae, ngingi ta mitema ane ne ngemulaxu tangengi noxou Lataua kitu'asi ne. 31 Aloxo ne, la sou mamu sou ngingi ngaxavutala piena no anu mii ma'ia sou nga'ou mo ngaiexu mo ngatokolomoxu. 32 ^oXo ta mitema ane ilavusou Lataua uasi no lia 'o ne, ane'i ixavutala piena sou ikakamulinu mimii ane ne. Ia Maminge muxolu no opo loxotolo ne mulavusou lexe mimii ane ne, anu laixe sou ngingi ngano'u. 33 ^pIa mii vile lexe ngingi nga'oxonu tei aloxo, ngingi ngaxolu ngataloxolingenge no laaxu Lataua mo ngalomuxu la sou Anu ulosinge mimii latala kalumo. 34 Aloxo ne la sou ngaxavutala sou ne'iela mamu, Xo ne'iela ne anu voxo vilemo, xe tu'umaxu sou voxo vilevilesi ne anu iou vilesisi uasi.